2019 日本中部行之賞楓賞蟹賞白川鄉Day 11 (築地青空三代目)

終於到最後一日啦, 又要返回現實啦. 今日我訓左兩粒鐘就起身, 我地要10:00前check-out,
將key放回信箱, 之後就拖住重重既喼去坐地鐵去名古屋站. 其實我地最主要係想食個lunch就坐車去機場. 我地既target係築地青空三代目 大名古屋ビルヂング店. 因為肥仔話最後一餐想食壽司. 我地去到壽司店10:xx, 佢要11:00先開門, 咁我太多野拎所以唔想再買野, 於是我話負責看好行李同拎位, 叫肥仔青姐去行下.

等到10:45有店員出黎登記, 開始都有人排隊. 我就whatsapp青姐佢地叫佢地返黎. 11:00店員就帶我地入座.可能佢見我地有大行李, 佢安排左最入既6人位俾我地, 好好喎.

我地睇完lunch menu就決定最後一餐食好d, 所以order左omakase 10件, 6500yen. 整體黎講食材都好新鮮, 海膽差dd(因為大家要求高左=P),  肥仔就覺得白米會好過醋米.

lunch後我地仲有少少時間就去百貨公司地庫走走, 青姐買左壽司返香港食. 13:00 我地就坐名鐵
去中部機場, check-in後諗住睇下有冇手信買, 但係禁區內得一間有得買土產, 選擇唔多, 仲要超多人排隊, 都幾失望架. 因為開頭會以為好似新千歲或成田咁多野買呢. 所以都係係市區買定手信先會好d.

2019 日本中部行之賞楓賞蟹賞白川鄉Day 10 (香嵐溪)

今日又係要好早起身呀, 因為我好想去愛知人氣No.1既香嵐溪睇紅葉呀. 而咁岩我地去名古屋既日子就係紅葉盛放既日子所以更加要去一睹風彩.

到香嵐?既交通有三種:
1. 名鉄名古屋本線東岡崎駅坐足助行巴士, 車程70分鐘, 香嵐溪下車
2. 名鉄三河線豊田市駅坐名鐵巴士足助行, 車程45分鐘, 香嵐溪下車
3. 愛知環状鉄道八草駅坐香嵐溪直行巴士, 車程60分鐘 (9/11-30/11運行) 800yen

我係網上見到自駕會超級塞車, 又好難泊位所以就冇自駕. 因為我地住今池, 所以可以坐地鐵藤が丘駅, 再轉環状鉄道到八草駅, 便可以坐紅葉期運行巴士直達香嵐溪, 由於巴士行另一條路,
所以避開塞車位. 我地8點鬆d已到八草駅,  坐第一班巴士, 排第三, 之後就越黎越多人. 好彩我地早到所以有位坐. 巴士8:35出發.9:30已到香嵐溪, 好順暢. 我地一落車就見到有一棵好大既銀杏樹,好靚呀!

過左馬路就已經黎到香嵐溪入口. 紅葉盛放, 好美, 可惜天色唔好所以影既相都比較暗.我地開始行入停車場, 已經有幾間小販檔賣食物啦, 我地沿溪行入去, 經過待月橋就會到香嵐溪廣場.
因為係紅葉祭, 所以香嵐溪人山人海, 尤其係廣場, 到處都係人龍, 佢地排緊隊買唔同既小食, 刀削麵, 五平餅等.我買左好大粒既栗子. 再行入去就有土產店, 咖啡店. 再向前行會經過第二及第三條橋香嵐橋, 呢度都有長長薯條, 炸雞同蕃薯.肥仔決定幫襯呢檔. 之後我地就過對面折返. 過到對面都會有小食店, 之後我地一路行一路影相. 青姐話原來去番頭頭有牛舌食.我同肥仔聽到就加快腳步去食叻. 其實返到去溪頭都差唔多時間要走架啦. 因為巴士好疏所我地要捉緊時間.

但原來行前d轉左既停車場仲有好多檔口架. 我同肥仔只能草草行左一圈. 因為已經食蕃薯食飽左所以食唔落其他野. 青姐就買左一包好大包既焙茶茶葉.

我地估唔到行下行下都可以行左4個鐘! 之後就坐1:30巴士回八草, 再坐返去藤が丘駅. 青姐見到藤が丘駅有超市所以想行下先. 於是我地又唔小心買左零食啦.

我地原本計劃去蓬?軒食鰻魚既, 但因為唔小心買左野好重所以想放返Apartment度先. 因為我地買左地鐵一日pass.但係我地又驚遲左去蓬莱軒就冇位, 於是就分開兩路, 肥仔幫我地放戰利品番Apartment, 而我同青姐去搵位.

我地去左榮既あつた蓬莱軒松坂屋店諗住拎位先. 我地上到去已經見到有人等緊啦. 店員話要人齊先入得, 我地同前面都差一個人所以就唔入得. 其後開始越黎越多人啦. 我地不停whatsapp肥仔啦.

好彩二十分鐘後肥仔都黎到. 我地即刻同職員講我地齊人. 5:30就可以入痤.

青姐又叫佢最愛既白身鰻魚, 肥仔就叫左重鰻魚飯, 而我一場黎到名古屋當然order左名古屋名物鰻魚三食啦.

鰻魚三食好大好多飯, 所以我可以分堆飯俾青姐.

要食鰻魚三食. 首先就咁食鰻魚先, 然後就落埋蔥等配料, 最後就加埋茶湯, 變成鰻魚茶漬飯咁.
我偷左青姐少少白身試下, 食到鰻魚既魚脂感, 冇汁都唔錯. 當然都係東京尾花最正啦.

食完晚飯時間尚早, 只見等侯入內既人龍已經圍左等侯區一圈, 好誇張. 好彩一早去食啫.

我地開始分開行下榮. 我就去左Pokemon Centre買左懶懶的卡比, 又去左SKYLE既KEYUCA雑貨睇下有冇牙膏牙刷架賣.呢間店都幾多toilet用品賣, 仲有衣服, 廚房用品, 唔錯. 之後再上去睇下daiso. 呢排睇左開電視既百元商品.見到有d商品幾有用好想買. 其中一樣就係3A電2A電既轉換商品, 方便屋企冇時頂住檔先. 另外又買左煮蛋計時器. 本來仲想買多d, 但呢間daiso 8點就close, 真係好想佢開夜d呀>_<

日本既店真係太早close啦, 之後都唔知去邊好. 肥仔whatsapp我地話佢走左去金山站行下, 見到固度有間Seria開到9:00,另外後面仲有Aeon開到11:00呢, 我同青姐見今日都差唔多係旅程最後一日, 所以就去埋金山站行下.

我地去行左Seria先, 我終於搵到我想要既type c同普通usb雙頭cable, 另外買左個usb extension cable, 再買左個普通usb變type c既頭頭, 咁我就可以將以前既usb線變type c線啦. 7.2 HKD平過肥仔倉.

之後我地又行下呢個mall, 佢有boutique外仲會有雜貨店呢. 跟住我地就去左Aeon超市行下. 又買左d零食先返今池Apartment.

返到Apartment肥仔又開始開餐, 佢係Aeon買左靚牛牛係Apartment煮, 我地就癡左佢一舊食, 入口即溶好正. 佢又買左壽司所以我地又食左d. 之後我就要pack行李啦!! 呢個真係超級頭痛, 因為實在係買得太多, 首先要分好類, 又要拆盒, 將幾件零食放落一個盒度,又要影番個packing. 結果我竟然pack到第二朝6:00先塞好哂!! 我頂唔住要訓番兩個鐘先. 肥仔本來話小休結果6:00先起到身,於是就輪到佢pack行李.

香嵐渓

あつた蓬莱軒