2009年12月1日 星期二

澳洲九天玩轉海陸空之旅Day 5 (開恩茲Cairns)


行程: ATV四驅車 => Air play滑翔傘 / 激流 / Scenic Rail熱帶雨林Day Tour.

對住海景食早餐一流
第五日係分開活動日, 因為大家既興趣唔同,我地有四個團友都係好動之人, 所以大家上午都選左玩ATV四驅車, 下午我地有三個就去玩滑翔. 因為一黎大家都唔知敢唔敢跳傘, 二黎跳傘貴好多(AUD 270, 滑翔 AUD 142),三黎覺得跳傘跳完好快就玩完, 滑翔可以玩20 minutes, 好似stay係空中耐D, 感覺會好D. 本來肥仔團友都好想玩, 點知.....
就係因為太肥唔玩得啦. 滑翔傘既體重限制係大約二百磅咋.....
肥仔唔玩得滑翔傘, 只好自己一個去玩半日Barron River激流算啦. 至於另外一個團友就成日話自己一把年紀唔可以玩得太激(其實佢四十都未到 =P), 所以就參加左個熱帶雨林Day Tour, 全程有廣東話導遊, 行程首先坐SkyRail Cable Car上Kuranda市集, 市集有土著表演, 可以坐水陸Army Duck遊熱帶雨林, 有樹熊抱, 之後會坐Scenic Rail火車去番Cairns.
 
好啦,, 講番我先啦, 今日要一早起身, 因為ATV公司會係酒店接我地. 禽日雖然隻腳敷左冰, 但係都已經腫左.由於俾左好貴既尾數玩四驅車和滑翔, 所以就想盡量去玩. 我地首先於露台附設既餐檯上享受由肥仔煮既早餐, 跟著就落去酒店大堂等ATV專車接送. 佢地會載我地去佢地公司係Kuranda設既Site進行活動. 而呢間公司除左四驅車外, 亦可以於熱帶雨林騎馬. 我地由於事前填form填左beginner level, 所以佢地要我地一條線咁行, 仲要係女仔排先. 攪到D男團友好無癮. 唯有等前面既人行左一段路先, 有一段距離先, 然後先以快速行一段路啦. 好彩我都玩到ATV咋, 因為咁岩踩brake個位冇觸及痛位, 所以都可以玩足全程.

熱帶雨林四驅車場
玩克ATV佢地會有一個Simple BBQ Lunch. 我地expect會有得燒腸仔, 肉類呀咁, 點知.....
真係估都估唔到所謂既BBQ Lunch就係得熱狗!!!!!

所謂的BBQ Lunch

除左四驅車仲可以騎馬
第一BBQ係佢地燒既, 呢個都算啦, 但係所謂BBQ食物就只係得腸同洋蔥! 個包就係得熱狗包同多士俾你選, 真係超級搵笨.
 
Lunch後ATV公司就車左我地去Kuranda Station, 跟住滑翔公司架車就係固度接我地. 個教練Greg有隻狗同行, 叫做阿Patch, 佢話係佢個Boss喎.
滑翔教練Greg既Boss, 叫Patch



Greg 話今日個風都唔係咁好, 起飛成數只有50/50, 不過都即管去目的地睇下先啦.
 
經過30mins車程就去到一個懸崖邊, 亦即係我地要跑出去既地方. Greg見到崖邊右邊沙灘既浪就話Oh!! Great!! 立即set up好個滑翔傘. 問我地邊個玩先. 我第一個就話要玩啦, 呵呵. 由於佢驚之後會冇風, 所以佢搵左另一個教練幫手飛. 我簽左張生死狀後, Greg就幫我著個套, 我好似成條蟲咁. 跟住佢就Brief我點起跑, 起飛後點收埋隻腳. 好彩佢坐跑幾步就可以起飛咋, 因為我隻腳都仲可以抵受得住. 起飛後既感覺真係好好, 完全唔驚冇離心力, 個傘好Stable. D風吹下吹下好舒服呀, 又可以欣賞到風景. 係飛行途中Greg係咁讚今日既天氣. Great! Marvellous! Beautiful! 令我感受到佢對滑翔既熱愛. 佢同我講佢已經有25年玩滑翔傘既經驗啦, 而家佢依然好enjoy flying.
 
靠海浪測風

唔好砌少左呀, 我條命係你地上
 

好多人睇住呀, 仲要影埋相呢

gogogo



沿途Greg會介紹下附近既環境, 佢地點樣睇浪決定到適唔適合飛,
(因為滑翔係一種非常依賴天氣既活動, 所以唔係日日都飛到) 點樣控制個滑翔傘等. 仲俾我輕輕揸住枝桿去感受下佢點樣控制呢. 至於最正都係臨降落沙灘前佢飛出海面轉既一個圈, 因為好似雀仔係海上飛咁, 好relax咁架. 最後我就係沙灘降落. 之後Greg就再去懸崖同另一幫手一齊載埋另外兩個團友起飛, 事後聽番團友講另一個教練似乎經驗冇咁好, 因為佢唔肯載其中一個團友, 因為其中一個團友都差唔多超重呢 =P



滑翔都真係幾好玩呀, 下次大家去Cairns玩Sky Diving之外, Hang gliding都
可以考慮下啦.

玩完Hang gliding之後Greg會免費車我地返酒店呢, 佢同我地講先一排有幾個香港人去搵佢玩Hang gliding, 但係冇地方住, 就住左係佢屋企, 之後就唔知點解有多左香港人搵佢Hang gliding喎.. 呵呵, 梗係啦, 有免費地方住喎, 知先我都早D識佢啦. 另外佢知道左我係IT人之後, 佢話似乎香港人個個都讀電腦呢, 因為之前固幾個香港人都係讀電腦. 其實係咁岩啫, 香港讀電腦冇前途架, 讀專業例如醫生會計律師先有前途架.

Greg送左我地返酒店, 我地見另外兩個團友仲未返, 於是就沖番個靚涼休息下, 順手利用埋Apartment既洗衫房洗哂D污糟衫, 呢個亦都係住Service Apartment既好處!
 
固程途中見到彩虹
我地一面休息一面等團友返黎, 肥仔團友番黎後就話半日激流唔夠激, 落差點細, 佢仲話自己跳落水忝. 佢話可能一日激流落差點大會好玩D.
 
我地休息到晚飯時間至出去搵野食, 見到有間Pub好似好多人咁就入去食晚餐, 之後就去行夜市同埋係免費泳池附近散步. 可能呢幾日玩左好多海陸空活動, 所以大家都好累, 呢晚係我地最早訓覺既一日啦.. 有人已經十點幾就訓啦.


 









食完晚飯周圍行下

Night Market

免費大型游泳池Lagoon



 

實用資料:
Blazing Saddles => ATV四驅車及騎馬
http://www.blazingsaddles.com.au/
呢間滑翔公司可以免費接送客人, 另外一間要俾多AUD 15接送
http://www.airplayhanggliding.com/
有 ATV + 激流Package, 平過分開玩
http://www.ragingthunder.com.au/
Kuranda Scenic Rail and Sky Rail
http://www.ksr.com.au/
http://www.skyrail.com.au/
**記住搵Cairns既local Agent去book呢D Package呀, 會再有Discount架!!!!